Rom 3 | BJR | STEP | Qinée minára irámmirisee qímannimianaura Yuda máqannaasa ánaamuru úrinnaaqaraqa máridee káqi fífau fee miqíqa márida fee. Misá fáinanduqirausa misée ánaamuru úrinnaaqaráidee káqi fífau fee miqí qída fee.

Romans 3

1 Qinée minára irámmirisee qímannimianaura Yuda máqannaasa ánaamuru úrinnaaqaraqa máridee káqi fífau fee miqíqa márida fee. Misá fáinanduqirausa misée ánaamuru úrinnaaqaráidee káqi fífau fee miqí qída fee.

2 Óo sía fífau miqí qídaqa misá úriqararafa firaafá máridanoo. Dóo qinée óosanarasee maaqí qímasee qímannimianaura, Ánutufa narí ufa Yuda máqannaasasaa quqáqoofanoo márinau. 3 Akaqáusa sía narísaa quqáqoonara irisée andeeqáramau fíqa rukíasee káqi rúnnambiqau. Ánutufa misá fúrufarirana qáfamaseenoo qinée faqa misá qíma afeekaikámma nímiafanna ufana qinée faqa misá naanna réeqa rukíaanauree qianáuree.

4 Qinée Pauroosa minára maaqí qídaqa. Óo sía uqanna Ánutufa mi-mandoosanná máraannoo ánoona ufa kai qímarifa máridanoo. Faiqí ánaasee únnufa kai qímariasa kai máriafanoo sía Ánutufa miqíannoo andeeqásee ánoona kai qíannoo. Óoqeenaa ákara Ánutunara maaqí qinóo máridanoo.

Aní óokinaa ufara aiqámausa ánoona ufa fée qifáranoo. Misá aní ufara amanamándee írifanoo ánoonaikammíannoo.
Dafidina ákarakinaa ufa Ánutunara miqímminoo máridanoo.

5 Misá faiqí faiqi únna qímasee maaqí qímasee Ánutuna andeeqáranara qídaqa. Maasá faiqí faiqi qiqá áaqarafa quándaki Ánutuna andeeqárana mara máree koorooméeqeenoo uqéerainaqa maasá qeeqá áaqaranara ámiqira ainainee qianáuree. Miqóoqari maasá maaqí qianáura mandáinaina ákiaqara maasá Ánutufa dárinaqa maasá maaqí qianáura Ánutufa áaqaidanoo dáridanoo fee qianáura. 6 Qinée Pauroosa minára maaqí qídaqa. Óo sía uqanna Ánutufa áaqaidanoo. Ánutufa sía uqanna áaqaidanoo, narí andeeqárafa márinara maasá andeeqáqisáannoo miná andeeqárafa sía márinanoofau sía amana maasá aiqáma máqannaasa ufa iriseenoo andeéqaisáiqini.

7 Misá faiqí faiqi únna qímasee maaqí qímasee Ánutuna ánoona ufara qídaqa, maasá qiqá únna ufa fannoo Ánutuna ánoona ufa kooroomáfi uqéerainanoo qiqá únna ufa ámiqirafa máridanoo nánaree Ánutufa qiqá únna ufa ákiaqara qiqá dáruannoo fee. 8 Qinée mi-manda ufánara eedóo qía̱naqau maaqí qiaqíni, Dóo ániaqa maasá mandá márirana uqéeraseeqa minánnai ámiqira márirana kambíqasaanee qiaqa. Mi-manda ufána uqéereemaria fasiqausa Ánutufa misá mara máreenoo nári náriranaki quqáannoo. Sía áaqaidanoo miqídanoo, andeeqáidanoo miqídanoo. Mi-aaqara ufána qímariasa qiní Pauroosara faqa únna qímasee Pauroofa maasára mandá márirana uqéerasee minánnai ámiqira márirana kambíqaanifeera qímasee minánnai qiní díqidaqa áaqee maríafanoo.

Aiqámausa nári mandáinaina ámeemaanai máridaqa.

9 Dóo qinée kafáa Pauroosa minára maaqí qímasee iráidaqa, Ánutufa maasá Yuda máqannaasee, ánaamuru máriasee, úriqaraida fee qídanoo amana amana kái fee máridee qídanoo. Qinée Pauroosa óo sía moo úriqarara fee qídanoo dóo qinée fáasai qímannimiqa sía moó fannoo úriqararafa máriaafoo qídaqa ánaamuru faqa maasá Yuda máqannaasa faqa nári mandáinaina ámeemaanai uréeqaqa máriaafoo qídaqa. 10 Óoqeenáa tamummaqara fasiqausa ákara minára maaqí qínoo máridanoo.

Aiqáma maa-maqa maaqánaki máriasakiqari moodáa fasiqa sía uqanna andeeqárafa máridanoo, aiqámausa miqírausa kai máridaqa. Misákiqari sía moodáa fasiqa Ánutuna aanára randáidanoo.
12 Aiqáma fasiqa ánaasee uqanna Ánutuna áfusaaqari quándaki káqi rúnnamma ubeekámásee áaqaranaki fímariafanoo. Sía moodáa fannoo ámiqira óosana máraidaqa sía uqanna.
13 Misá nóo áamara faiqí mádikara foora óo raqánoo márifaqa faiqí kurídidaqa. Misá ufa fannoo sakáni ukaqá
nímiranara foora ínoo máridanoo faiqí kuqánnaruaqaa úfa kai qímariasa.
14 Misá nóokiqari sukúfa kai qídaqa níquraree maríasa.
15 Misá dauní faiqí kuqánnarirana aupúrarana nímimariasa.
16 Miqí maríasa fímaríaqoo kai fáaqa fuísee qírana faqa aiqáma ainaina kuridi káaridiqa túri taariqa fídaqa.
17 Misá sía asooára aana qáfeeqa sía Ánutunara náaquqaranara írimariasa máridaqa.
Óoqeenaa tamummaqara fasiqauqa akara Yuda máqannaara faqa ánaamuru máriasara faqa amana amana kai miqí maríasee qímaqoofa máridanoo.

19 Mooseena sándufakina miná ámeemaanai máriasara qídanoo qímarifaqa maasá minára íridaqa. Faiqí ánaasee aiqáma maa-maqannáasa náriara andeeqárausee qímaria úfana óosana óosanauqa aruséeqa aiqámausa maréeqee Ánutuna náríra ufa ámeemaanai quqáaqeera Mooseena sándufa ani máridanoo. 20 Sía faiqí ánaasee moó fannoo Mooseena sándufannái andeeqára fasiqaikámambi Ánutuna áfusaa máriannoo. Sía minárau Mooseena sándufa ani máridanoofau. Faiqí ánaasee maasá áaqee marúnausee qiaqéera Mooseena sándufa ani máridanoo.

Ánutuna áfusaa andeeqásee márirafa kooroo inóo máridanoo.

21 Dóo maqee kámuqoo Ánutuna áfusaa andeeqáfi márira oosana dóo kooroo inóo máridanoo. Sía Mooseena sándufarau qídau, áaduma moo úfara qídaqa. Mooseena sándufa faqa tamummáqarausa ufa faqa dóo minára kooroomásee maaqímminoo máridanoo. 22 Faiqí ánaasee narí Ánutuna ásauku mundírana saqárikiranannai Ánutufa maréeqee narí áfusaa andeeqáranaki quqáidanoo. Aiqámausa ásauku mundírana Yísuna ufa irisée minásaa rusímáriasa miqí qímariasa aiqáma maqannaasa Ánutufa maréeqee narí áfusaa andeeqáranaki quqáidanoo sía rainá rainíannoo. 24 Aiqáma maqannaa fasiqa ánaasee áaqoonara Ánutuna innaarúna asumu máriranasaaqari níanai máriafanoo minára Ánutufa narí áfaariranakiqari káqi nímira ainaina narí ásauku mundírana Yísunannai misá maréeqeenoo narí áfusaa andeeqáranaki quqánniséenoo nári mandáinainakinaana idukúnnisanau.

25 Ánutufa Yísunannai faiqí ánaasee mandáinaina ákiaqara minínnisaaninafa kambíqaanifee qímasee Yísuna aqiqámasee nímufaqa aunírira saqarisaa áriqau. Mi-fasiqa anaaseesá náriqa Ánutuna andeeqáranaki sía amanaikíqa Yísuna saqárikidaqa. Minakí kéeqaranannai Ánutufa misá mandáinaina taikánnisaidanoo. Ánutufa narí andeeqára oosana kooroo íanifeera qímaseenoo narí ásauku mundírana aunírira saqarisaa quqáseenoo minánnai faiqí ánaasee mandáinaina ákiaqara narí máranau. Óoqai máru aukuana Ánutufa faiqí ánaasee sía mandáinainara nárimarinau kísaaqasaa kásooinoo márida nífauee marínau. 26 Maqee mári aukuana dauní ufa qímasee andeeqánnisaidanoo narí andeeqárana kooroo íanifeera faiqí ánaasee maréeqee narí áfusaa innaarúna andeeqáranaki quqáidanoo. Ánutufa Yísuna maréeqeenoo aunírira saqarisaa aruséenoo minánnai maasá mandaínaina taikáqisanau. Miqíranannai Ánutufa qaara ainaina kooroo ídanoo, narí andeeqárana faqa Yísuna ufasáa írirana rusísee mi-maú fímariasa maréeqee narí áfusaa andeeqáranaki quqánnisarana faqa kooroo ídanoo.

27 Yuda máqannaasa Mooseena sándufamau fídaqa náriara andeeqárausa máridee qímasee nári nipatara nimooqída máridaqa. Sía sándufa miqínoo máridanoo Ánutuna ufasáa írirana mundínoo márifa narí miná mandaaqée marínafa mifá kai andeeqárafa máridanoo. Mifá kai Ánutuna innaarúna andeeqáranaki quqáqisáidanoo. 28 Minára maasá maaqí qídaqa Yísuna saqárikiranannai kai Ánutuna innaarúna andeeqáranaki kéeqafi máriannoo, sía Mooseena sándufamau fínnanannai innaarúna andeeqáranaki kéeqeefaranoo. 29 Ánutufa Yuda máqannaa Anutufa kai fee máridanoo, ánaamuru máriasa Ánutufa faqa máridanoo fee. Dóo Yuda máqannaa faqa ánaamuru aiqámausa faqa Ánutufa máridanoo.

30 Ánutufa moodáa máridanoo, moodáamau fímarifa máridanoo. Yuda máqannaasa Yísuna saqárikiranannai Ánutufa maréeqeenoo narí áfusaa andeeqáranaki quqánnisáannoo ánaamuru faqa narí áfusaa andeeqáranaki quqánnisáannoo anaamuru máriasa faqa miqí kai másee Yísuna saqárikinnanannai narí andeeqáranaki quqáannoo. 31 Míqunannai maasá Yísuna saqárikidaqa sía minánnai Mooseena sándufa maréeqee áqidaqa, sía miqídaqa maasá minánnai Mooseena sándufa uqéeraidaqa mi-maú fídaqa, minára mi-sandufána ánoona paqúridaqa.